د پاکستان په شمالي برخه ګلګت بلتستان کې نامالومو کسانو ۱۳سکولونه سوځولي چې زياتره يې د جينکو دي.
د ګلګت د ديامیر استور کمشنر عبدالوحيد شاه وي او ای ډيوه سره په خبرو کې پخلی کړی چې په علاقه کې د ۱۳ پورې سکولونه سوځول شوي چې پکې د اته ؤ پورې سکولونه د جينکو دي.
نوموړي ويلي سکولونه سوځول شوي خو داسې نه دي چې په بشپړ ډول تباه کړی شوي دي.
هغه وويل ښکاري چې د وران کارو هدف هم د جينکو سکولونه وو خو د دغې کار په شا ورته کوم غټ ترهګر پلان نه ښکاري او مالوميږي چې ځايي وران کارو دغه کار کړی وي.
د سکولونو سوځولو پېښې د ګلګت په ديامیر ضلعه کې رامنځته شوي او د ضلعې د مرستيال کمشنر دفتر وي او ای ډیوه سره په خبرو کې د ۱۱ سکولونو سوځولو او ورانولو پخلی کړی دی.
د مرستيال کمشنر د دفتر يو چارواکي هم وي او ای ډیوه سره په خبرو کې ويلي د ديامير په بېلابيلو علاقو کې سکولونه د تېرې نيمې شپې نه وروستو وران کړی شوي او سوځول شوي چې زياتره پکې د جينکو دي.
د ديامیر د پوليس مشر (اېس پي) راې اجمل نن د جمعې په ورځ سهار ډيوه سره په خبرو کې يواځې د سکولونو د سوځولو د پېښې پخلی کړی او ويلي يې ؤ په دغه اړوند نور مالومات رايوځای کوي.
نوموړي ویلي ؤ د پلټنو وړاندې نه شي ويلی چې د پېښې په شا د چا لاس دي.
د کمشنر د دفتر چارواکي ويلي په ګلګت کې د جولايۍ د میاشتې نه تر د اګست د مياشتې ختمېدو پورې د ماشومانو چهټيانې دي.
ځايي ټيلي ويژن چېنلې ښکاره کوي چې د سیمې خلکو د سکولونو د سوځولو پرضد احتجاجي مظاهره کړې او ويلي يې دي په سيمه کې د تعليم دښمنانو دغه کار کړی دی.
