د پاکستان د پوځ د لوړ پوړو چارواکو هيلي کاپټر چې پرون ماښام په بلوچستان کې بې درکه شوی، تراوسه نه ده موندل شوې، پوځ وايي، د هيلي کاپټر لټه روانه ده.
د بلوچستان د ضلع لسبېلې د پوليس د چاﺭواکو په خبره دوی د پوځي هيلي کاپټر په لټه کې دي خو تر اوسه يې کوم ثبوت په لاس نه دی ورغلی.
پرون د ګل/دوشنبې په ماښام [لومړي اګست] د پاکستان پوځ ويلي، د پوځ له هيلي کاپټر سره يې رابطه قطع شوې ده.
" د پاکستان د ارمي ايوېشن هيلي کاپټر کوم چې په لسبيله کې د سيلاب ځپلو په مرسته کې برخه لرله، له هوايي تريفک کنټرول ( اېر ټريفک کنټرول) سره يې رابطه قطع شوې، د 12کور کمانډر په مشرۍ کې شپږ تنه په هيلي کاپټر کې سواره وو، د لټون عمليات يې روان دي".
د پاکستان وزير اعظم شهباز شريف پر خپل ټويټر پاڼه ليکلي چې له بلوچستان څخه د پوځي چورلکې ورکېدل د اندېښنې وړ خبره ده.
د بلوچستان وزير اعلا مير عبدالقدوس بزنجو له لوري هم د هيلي کاپټر پر لادرکه کېدو اندېښنه ښودل شوې ده.
د بلوچستان حکومت وياندې فرح عظيم شاه و اردو نيوز نومي ورځ پاڼې ته ويلي پوځي هيلي کاپټر د دوشنبې په ماښام پر لس منټه لپاسه پينځه بجې د لسبېلې له اوتهل سيمې څخه پرواز کړی مګر له شپږ ساعتونود تېرېدو پس د شپې تر يولس بجو پورې لا هم د کراچۍ و فېصل نومي هوايي ميدان ته نه دی رسېدلی.
عسکري سرچينو په خبره په ياد هيلي کاپټر کې سفر کونکو کې د 12م کورد کمانډر يا د کوټې کمانډر ليفټنټ جنرل سرفراز علي، ډايريکټر جنرل پاکستان کوسټ ګارډ برګېډير امجد، د 12کور سي سي انجنېرنګ څانګې بريګيډېر خالد ،پايلټ يا چلونکی مېجر سعيد ، مرستيال چلونکی مېجر طلحه او د هيلي کاپټر يو کارمند مدثر پکښې وو.
د ځايي خبريالانو او عسکري سرچينو په خبره، جنرل سرفراز تر اوسنۍ پوځي زمه وارۍ وړاندې په بلوچستان کې تر دوه کاله زياته موده د ايف سي ځواک مشر( ایي جي ) هم پاته شوی وو.
ياده دې وي چې په بلوچستان صوبه کې له تېرې يوې مياشتې راهيسې د وسې يا پشکال بارانونو له عمله په ټول ايالت کې خونړي سېلابونه راغلي دي.
د افتونو پر وخت مرستندويه ادارې پي ډي ايم اې رپورټ دی چې د روانو بارانون او سېلابونو له عمله په صوبه کې 136 تنه مړه او ډيري ټپيان شوي دي.
د ايالت په سېلاب ځپلو سيمو کې د پي ډي ايم اې ټيمونو تر څنګ ضلعي حکومتونه، ايف سي ځواک او د پاکستان د ارمي عسکر هم د خلکو په ژغورنو او مرسته کې برخه اخلي.
