په پاکستان کې د انساني حقونو کارکونکو د هېواد په ټېلې وژن چېنلو د پښتون ژغورنې غورځنگ د وژل شوي فعالا غړي ابراهیم ارمان لوڼي په اړه د خبرونو په نشتوالي تشویش څرگند کړی دی.
د هېواد د انساني حقونو تر ټولو لوې ادارې هېومن رایټس کمیشن اف پاکستان په ټوېټر یو پېغام کې وویل د لوڼي د مرگ په اړه په ټېلې وژن چېنلو د خبرونو مکمل نېشتوالي "یو وارې بیا د ټي وي صحافت او د مطبوعاتو د ازادۍ د دعوو په اړه سنگین سوالونه راپورته کړې دي."
د هیومن رایټس کمېشن اف پاکستان نه علاوه په ټوېټر نورو څېړونکو هم د ارمان لوني د مرگ په سر د پې ټي اېم په احتجاجونو د پاکستاني د ټېلې وژن چېنلونو په خاموشۍ تعجب څرگند کړی دی.
عابد حسین په ټوېټر لیکلي چې د فېبرورۍ د پنځمې نېټې په مناسبت چې د پاکستان حکومت یې د کشمیریانو سره د یوالي د ورځ په توگه نمانځي مطبوعات د هند د انتظام دلاندې کشمیر کې د انساني حقونو د خلاف ورزیو ذکر خو کوي د پې ټي اېم د ارمان لوڼي احتجاجونه یې د پامه غورځولې دي او په دې هکله "مکمله خاموشي ده."
ارمان لوڼي د خالي، شنبې، په ورځ د بلوچستان په لورالای ښار کې د پې ټي اېم د احتجاجي ناستې ترڅنگ ژوند دلاسه ورکړی دی. د پې ټي اېم پلویان وايي لوڼي د پولیس په تشدد کې وژل شوی دی.
د بلوچستان د کورنیو چارو وزیر مير ضیا الله لانگو د گل، دوشنبې، په ورځ یوې خبري غونډې ته وویل د ارمان لوڼي د مرگ اېف اي آر (لومړی پولیس رپورټ) لا نه دی درج شوی ځکه چې د پوسټ مارټم یا د هغه د مړي د ډاکټرې معاینې رپورټ نه دی ترلاسه شوی.
د ارماني لوڼي د وژل کېدو خلاف د پاکستان او افغانستان په بېلا بېلو ښارونو کې د نهې شه شنبې، په ورځ احتجاجونه وشول. د تحریک مشران وايي ځینې پلویان یې د احتجاجونو په مهال پولیس گرفتار کړې هم دي.
د پي ټي ایم مشران وايي لوڼي د ریاستي تشدد په ن تیجه کې ژوند دلاسه ورکړی دی.
هیومن رایټس کمیشن اف پاکستان ویلي ارمان لوڼي د احتجاج آیني او اخلاقي حق لرلو او د هغه مرگ دې ځوابونو ته اړتیا لري چې په پاکستان کې بنیادي ازادیو ته څومره سپک کتل کېږي.
