د پاکستان د پوځ یو جرنیل دا خبره تسليم کړي ده چې پوځي استخباراتي اداره ايي ایس ايي په هیواد کې میشته وسله والو ډلو سره روابط لري.
د پوځ د مطبوعاتو د څانگي یا ايي ایس پي ار مشر میجر جنرنل اصف غفور باجوه د زیارت، پنجشنبې، په ورځ خبریالانو ته وویل وسله والو ډلو سره د یوې استخباراتي ادارې روابط د معمول خبره ده. خو هغه په دې زور واچولو چې ریاست د کومې ترهگر ډلې ملاتړ نه کوي.
"په روابطو او ملاتړ کی ډیر فرق دی. د یوې استخباراتي ادارې نوم خو واخلئ چې دداسې قسمه ډلو سره روابط نه لري،" جنرل غفور د راولپنډۍ په پوځي هیډکوارټر کې خبریالانو ته وویل.
جنرل باجوه په داسې حال دا خبرې کړي چې څو ورځې وړاندې د امریکې د دفاع وزیر جم مېټس او د امریکې د پوځي مشرانو د گډې کمیټۍ مشر جنرل جوزف ډینفرډ وسله والو خلاف په مناسب ډول د اقداماتو نه کولو په سر په پاکستان تنقید کړی دی.
د نهې په ورځ د امریکې د سنیټ د پوځي چارو کمیټۍ ته وینا کې جم مېټس وویل د افغانستان دپاره د صدر ډانلډ ټرمپ د نوي تگلارې د کامیابۍ په لړ کې به پاکستان سره د همکارۍ یو ورستی کوښښ کولی شي او که چرې دا کوښښونه ناکام شول نو بیا صدر بل هر ممکن گام پورته کولو ته تیار دی.
د امریکې د سنیټ په یوه بله اورونه کې جنرل ډینفرډ وویل "دا خبره ماته واضحه ده چې ایي ایس ايي د ترهگرو ډلو سره روابط لري."
د افغانستان او په مجموعي توگه د جنوبي ایشیا دپاره په خپله نوي تگلاره کې صدر ټرمپ په پاکستان په خصوصي توگه غږ کړی چې په خپله خاوره دې د وسله والو پناه ځایونه ختم کړي او د مذاکراتو میزته دطالبانو په اماده کولو کې دې خپل کردار ادا کړي.
پاکستان په خپله خاوره د وسله والو د موجودگۍ خبره ردوي او د افغانستان لپاره د صدر ډانلډ ټرمپ د نوي تگلارې مخالفت کوي وايي دا تگ لاره په افغانستان کې جگړې ته دوام ورکوي.
